تاند ( شنبه د مرغومي ـ جدي ۲۷مه) استرالیا د ټولنیزو رسنیو له اغېزو څخه د ماشومانو د ساتنې لپاره یو پرېکنده ګام پورته کړ.
له همدې امله، د اسټرالیا حکومت د ماشومانو او کم عمره کسانو میلیونونه حسابونه ختم کړي دي.
چارواکي وایي، دا پرېکړه یې د ماشومانو د ساتنې لپاره پورته کړی څو دوی د ټولنیزو رسنیو له منفي اغېزو خوندي وي.
د دې ترڅنګ دا پرېکړه د ټکنالوژۍ شرکتونو ته یو روښانه خبرداری هم ورکوي څو د دغه هېواد له اصولو سره سم فعالیت وکړي.
دا بندیز د ډسمبر په لسمه لګول شوی و او تر هغه وروسته عملي هم شو.
په همدې حال کې، د استرالیا حکومت د قانون د پلي کولو لپاره سخت دریځ خپل کړی او هغو شرکتونو ته یې ګواښ کړی چې د قانون له مراعتولو پرته به پرې جریمه ولګوي.
حکومت هیله لري چې پر شرکتونو دجریمې لګولو په صورت کې به د راتلونکو سرغړونو مخه ونیسي.
تر دې پرېکړې وروسته اسټرالیا د نړۍ لومړنی هیواد شو چې، دا ډول اقدام کوي او د ماشوم ساتنې لپاره جدي ګامونه اخلي.
په دې بندیز کې د هغو ماشومانو حسابونه لرې کړای شول چې، عمرونه یې له ۱۶ کلونو کم وو.
د ټولنیزو رسنیو پوهان هم د ټولنیزو رسنیو او ځوانانو د ذهني روغتیا اړوند پر پالیسي جوړوونکو، د ټکنالوژۍ پر شرکتونو، څېړونکو، میندو او پلرونو او ځوانانو غږ کوي چې په ګډه کار وکړي او ټولنیزې رسنۍ د ماشومانو لپاره خوندي کړي.