تاند ( شنبه د مرغومي ـ جدي ۲۷مه) ایران کې د حکومت ضد لاریونونو له کمېدو وروسته؛ ډونالډ ټرمپ وايي چې تهران د څه باندې ۸۰۰ کسانو د اعدام حکم لغوه کړی دی.
ټرمپ په خپله ټولنیزه شبکه له ایراني چارواکو مننه کړې چې، د سلګونه لاریونوالو د اعدام حکم یې لغوه کړی دی.
تر دې وړاندې د ایران بهرنیو چارو وزیر، سید عباس عراقچي ویلي وو چې، تهران تر دې دمه هېڅ لاریون کوونکی نه دی اعدام کړی او نه د دې اقدام هوډ لري.
ټرمپ دا څرګندونې له هغو خبرو څو ورځې وروسته لیکلي چې ویلي یې وو دا مهال په ایران کې د لاریونوالو وژنه درول شوې ده، او په همدې خاطر د تهران پر وړاندې له پوځي اقدام پر شا شوی و.
په دې وروستیو کې د تهران او واشنګټن اړیکې په ایران کې د حکومت ضد پراخو لاریونونو له امله ترینګلې شوې وې او ټرمپ خبرداری ورکړی و چې که ایراني چارواکي د ایراني لاریونوالو وژنه ونه دروي نو د دغه هېواد پر وړاندې به پوځي اقدام وکړي.
کارپوهان وایي، د امریکا د ولسمشر له دې څرګندونو ښکاري چې ګواکې په ایران کې د حکومت ضد لاریونونه کابو شوي او وضعیت نورمال حالت ته ګرځېدلی دی.