تاند ( سه شنبه د مرغومي – جدي ۲۳مه) د پاکستان د سوداګرۍ وزارت ویلي، هغه افغان ټرانزیټي توکي چې اوس مهال کراچۍ او ګوادر بندرونو اومختلفو کرښو کې بند دي، د صادرولو اجازه ورکوي.
د خبرپاڼې له مخې دا اجازه د صادروونکو له غوښتنې وروسته ورکړل شوې ده.
خبرپانه کې ویل شوی، چې دغه پرېکړه د پاکستان د فدرالي عوایدو ادارې (FBR) له ځانګړي استثنا وروسته شوې ده.
د طالبانو د حکومت اړوندو ادارو تر اوسه د پاکستان د دغه اقدام په اړه کوم غبرګون نه دی ښودلای.
دا په داسې حال کې ده چې شاوخوا درې میاشتې کېږي، چې پر فرضي کرښه د طالبانو او پاکستان سوداګري په بشپړه توګه تړل شوې ده.
دا سوداګري وروسته له هغې بنده شوه کله چې پاکستان پر افغان خاوره برید وکړ او ورسره هممهاله یې لارې وتړلې.
خو وروسته د طالبانو حکومت هم له پاکستان سره د هر راز سوداګرۍ د ختمېدو پرېکړه وکړه.