تاند (یک شنبه د مرغومي ـ جدي ۲۱مه) د طالبانو د کانونو او پټرولیم وزارت وايي، د تخنیکي تفتیش او کانونو انسټیټیوت د رئیسانو په مشرۍ د تخنیکي او مسلکي کسانو یو ۲۰ کسیزه پلاوی یې د روزنې په موخه ازبکستان ته لېږلی دی.
دغه وزارت نن یک شنبه په یوه خبرپاڼه کې ویلي چې، دا پلاوی به په یاد هیواد کې د ظرفیتونو لوړولو او مسلکي ودې په یوه میاشتني روزنیز کنفرانس کې ګډون وکړي.
خبرپاڼه کاږي چې، یاد پلاوی به د دغه هیواد د بېلابېلو تخنیکي څانګو له لابراتوارونو څخه هم لیدنه وکړی.
سرچینه زیاتوي چې، دغه سفر د افغانستان او ازبکستان ترمنځ د تخنیکي او علمي همکاریو په چوکات کې ترسره شوی دی.
د ازبکستان او افغانستان ترمنځ په دې وروستیو کې راکړه ورکړه په هره برخه کې ښه شوې او د نظر خاوندان وایي، طالبان هم باید له دې فرصته په استفادې ظرفیتونه وروزي.