تاند ( یک شنبه د مرغومي ـ جدي ۲۱مه) برېتانیا کې یو کس د ایران د سفارت ودانۍ ته پورته شوی او د دغه سفارت اوسنی بیرغ یې ښکته کړی او پر ځای یې د ایران له ۱۹۷۹م کال انقلاب وړاندې د شاهي دورې “زمري او لمر” نښان لرونکي بیرغ لګولی دی.
په خواله رسنیو کې په خپرو شویو انځورونو او ویډیوګانو کې ښکاري، چې یاد کس د سفارت پر ودانۍ خېژي او د شاهي دورې بیرغ پورته کوي.
دا چاره د ایران پر روان وضعیت او د حکومت پر ضد د اعتراضونو په لړ کې یو سمبولیک اقدام بلل شوی دی.
تر اوسه د دې پېښې په اړه د برېتانیا پولیسو او یا هم د ایران د سفارت له لوري رسمي غبرګون نه دی خپور شوی.
خو دې اقدام په ټولنیزو رسنیو کې پراخ غبرګونونه راپارولي دي.
دا چاره داسې مهال ترسره کېږي چې، بل لورته د رسنیو د راپورونو له مخې ایران کې له تېرو دوو اونیو راهیسې نه کنټرولېدونکي او سخت لاریونونه دوام لري.