تاند ( سه شنبه د مرغومي – جدي ۱۶مه) هرات ولایت کې د ۲۰۲۵ میلاديکال پر مهال لسګونه نوې تولیدي کارخونو خپل عملي فعالیت پیل کړی دی.
د هرات د ولایت ویاند، محمد یوسف سعیدي، پر اېکسپاڼه لیکلي چې یوازې د تېر کال په اوږدو کې د هرات په صنعتي ښارګوټي کې شاوخوا ۳۵۰ لویې او کوچنۍ تولیدي فابریکې فعالې شوې دي.
نوموړي له صنعتکارانو ملاتړ، د پانګهوالو لپاره د لازمو اسانتیاوو برابرول او د جوازونو د ورکړې بهیر اسانه کېدل د دې ودې مهم لاملونه بللي دي.
طالب چارواکي وایي، له ایران او پاکستان څخه د زرګونو افغان کډوالو جبري ستنېدنه هم د پانګونې پر بهیر اغېز کړی دی.
د دوی په وینا، ډېری راستانه شوي افغانان د کاري او سوداګریزو تجربو ترڅنګ هېواد ته ګڼې پانګې هم له ځان سره راوړي چې همدې چارې د تولیدي سکټور د پیاوړتیا لپاره زمینه برابره کړې ده.
د هرات د صنعتي ښارګوټي مسوولان وایي، نوې فابریکې د خوراکي توکو تولید، ساختماني موادو، درملو، بستهبندۍ او سپکو صنعتونو برخه کې فعالیت کوي.
د دوی په وینا، دا کارخونې نه یوازې د کورني تولید کچه لوړه کړې، بلکې د وارداتو د کموالي او د ملي اقتصاد د پیاوړتیا لامل هم شوې دي.
د راپورونو له مخې، د دغو فابریکو فعالیت د سلګونو کسانو لپاره د کار زمینه برابره کړې ده.
ډېری ځوانان چې پخوا بېروزګاره وو، اوس په دغو تولیدي مرکزونو کې پر کار بوخت دي. ځینې کارکوونکي وایي، که صنعتي ملاتړ دوام ومومي، د کار فرصتونه به نور هم زیات شي.