تاند (سه شنبه د مرغومي ـ جدي ۹مه) د ټولګټو چارو وزارت ویلي چې، د سالنګونو لویه لاره د زیاتې واورې ورېدلو او توپان له امله د هر راز تګ راتګ پر مخ تړل شوه.
یاد وزارت په یوه خبرپاڼه کې ویلي چې، دغه لاره له پرون شپې راهیسې د هر ډول وسایطو د تګ راتګ پر مخ تړل شوې ده.
خبرپاڼه کې له موټر چلوونکو غوښتل شوې چې، تر بلې خبرتیا پر دغه لار سفر ونکړي.
یاد وزارت ډاډ ورکړی چې، د هوا په ښه کېدو سره به یاده لاره له واورې پاکه او بیرته به یې د تګ راتګ پر مخ پرانیزي.
د سالنګ لویه لار یوه له لویو سوداګریزو لارو څخه چې وخت ناوخته د بارانونو، واورې او طوفانونو له امله تړل کېږي.