تاند (دوشنبه د مرغومي – جدي لومړۍ) روسي لوړپوړی امنیتي چارواکی ډګر جنرال فانیل ساروروف نن د دوشنبې په سهار په سویلي مسکو کې په چاودنه کې ووژل شو.
نوموړی د روسیې د وسلهوالو ځواکونو د لوی درستیزانو د عملیاتي روزنې د څانګې مشر وو.
د روسیې د تحقیقاتو کمیټې د جنرال مړینه تایید کړې او دا پېښه یې “ترهګریزه” بللې ده او پراخه تحقیقات یې پیل کړي دي.
د ګارډین ورځپاڼې په وینا، چاودنه د یاسنایا په کوڅه کې هغه وخت وشوه، کله چې د لیفټیننټ جنرال فانیل ساروروف د موټر لاندې یو چاودېدونکی توکی وچاودېد.
۵۶ کلن ساروروف کار ته روان و او د سختو ټپونو له امله یې ساه ورکړې ده.
روسي چارواکو د اوکراین امنیتي خدماتو ته د ملامتۍ ګوته نیولې ده، چې دمخه یې د ۲۰۱۴ کال په دسمبر کې د جنرال ایګور کیریلوف د وژنو مسوولیت منلی دی.
اوکراین لا تر اوسه په رسمي ډول ځواب نه دی ورکړی.
یورونیوز راپور ورکړی چې چاودنه په یوه استوګنیزه سیمه کې شوې او د مرګژوبلې راپور نه دی ورکړل شوی.
د تحقیقاتو کمیټه د قصدي وژنې او د چاودېدونکو توکو د قاچاق د مادو لاندې قضیه څېړي.