تاند (یکشنبه) د لیندۍ/ قوس ۳۰ مه) ایراني چارواکي وايي، امنیتي ځواکونو یې سلګونه افغان کډوال، چې د ایران په شمال ختیځو سرحدي سیمو کې په سختې واورې او واورین توپان کې بند پاتې شوي وو، د ایران د وسلهوالو ځواکونو په هڅو ژغورل شوي دي.
ایراني رسنیو نن (یکشنبې) راپور ورکړ چې د تایباد د عمومي او انقلابي محکمې څارنوال حجت صدیقي ویلي چې د ایران د شمال ختیځ په سرحدي سیمو کې د درنې واورې او بادوریې له امله ټولټال ۲ زره او ۱۰۶ ناقانونه افغان کډوال په سختو او خطرناکو لارو کې بند پاتې شوي وو.
نوموړي وویل، دا کسان ایران ته له داخلېدو وړاندې په سرحدي سیمو کې د دېره وسلهوالو ځواکونو له لوري پېژندل شوي وو.
صدیقي زیاته کړه: «د بشري مرستو په چوکاټ کې، دغو کډوالو ته طبي او رفاهي خدمات برابر شول، څو له یخ وهلو او کنګل کېدو څخه وژغورل شي.»
د تایباد څارنوال څرګنده کړه چې له درملنې او د قانوني پړاوونو له بشپړېدو وروسته، دغه کډوال د خپل هېواد چارواکو ته وسپارل شول.
هغه ټینګار وکړ چې د ایران او افغانستان ګډې پولې د ناقانونه تګ راتګ لپاره ناامنې دي او له سرغړوونکو سره به قانوني چلند کېږي.
تایباد ولسوالي د ایران په شمال ختیځ کې، له مشهد ښار څخه شاوخوا ۲۲۵ کیلومتره جنوب ختیځ ته موقعیت لري، او د دوغارون سرحدي بندر له دې ښار څخه ۱۸ کیلومتره واټن لري. هر کال زرګونه افغان کډوال هڅه کوي چې له همدې لارې واوړي، خو په ژمي کې د واورو او خرابو هوايي شرایطو له امله له جدي خطرونو سره مخامخ کېږي.
ایران ته د اوښتو په لاره کې د واورې او یخنۍ له لاسه د څو افغانانو مړینې تایید شوې