تاند (دوشنبه، د مرغومي/ جدي لومړۍ) د سعودي عربستان د کورنیو چارو وزارت پرون (یکشنبې) اعلان وکړ چې د مخدره توکو د قاچاق په جرم دوه پاکستاني وګړي د مکې مکرمې په ښار کې اعدام شول.
د سعودي د کورنیو چارو وزارت د خبرپاڼې له مخې، دغو دوو پاکستاني وګړو هڅه کړې وه چې هیرویین او نور مخدره مواد د خپل بدن په بېلابېلو برخو کې پټ کړي او سعودي عربستان ته یې قاچاق کړي، خو امنیتي ځواکونو ونیول.
سرچینې زیاتوي چې اړوندې محکمې د جرم له ثابتېدو وروسته دواړو ته د مرګ سزا واوروله.
دوی وروسته له دې اعدام شول چې د سعودي سترې محکمې د هغوی عریضه رد کړه.
د سعودي چارواکو په وینا، دواړه پاکستانی وګړي د یکشنبې په ورځ د مکې مکرمې په ښار کې اعدام شول.
د سعودي عربستان د کورنیو چارو وزارت یو ځل بیا ټینګار کړی چې هر څوک چې د مخدره توکو په قاچاق او ورته ناقانونه فعالیتونو کې ښکېل وي، له سختو او بېساري سزاوو سره به مخامخ شي.
د مخدرو موادو د قاچاق په برخه کې د سعودي او ایران قوانین خورا سخت دي او عموماً د اعدام سزا لري خو له دې سره سره ډېر ځلي داسي شوي چې سعودي ته تلونکو افغانانو یا پاکستانیانو د نورو خلکو سوغات په خپل بار کې اچولی چې مخدر مواد پکې وي او له دې کبله په ناحقه اعدام شوي دي.