تاند (شنبه، د لیندۍ/ قوس ۲۹ مه) هغه راپورونه تایید شول چې د افغانستان په لوېدیځو ولایتونو کې د سختې یخنۍ له امله، یو شمېر افغانان د ایران پولې ته د ناقانونه اوښتو پر مهال د سړې هوا له کبله مړه شوي دي.
ځايي طالب چارواکو د جمعې په ورځ ویلي وو چې څو افغان کډوال د افغانستان په لوېدیځ کې له غیررسمي لارو ایران ته د اوښتو د هڅې په ترڅ کې، د یخنۍ له امله مړه شوي دي.
د هرات د والي ویاند د جمعې په ورځ (دسمبر ۱۹) تایید کړه، چې د کهسان ولسوالۍ سرحدي سیمې ته نژدې درې افغانان ایران ته د ناقانونه تګ پر مهال مړه شوي دي. د نوموړي په وینا، د پېښې په اړه څېړنې روانې دي او سیمهییزو چارواکو له ژغورونکو ټیمونو سره یو ځای د اغېزمنو کورنیو د مرستې لپاره اقدامات پیل کړي دي.
خو ځايي اوسېدونکو او ټولنیزو سرچینو د مړو شمېر تر دې ډېر ښوولی او ویلي یې دي، چې لږ تر لږه ۱۵ جسدونه کهسان او ادرسکن ولسوالیو ته راوړل شوي دي. د راپورونو له مخې، یو شمېر کډوال لا هم بې درکه دي.
عیني شاهدان وايي، په وروستیو کې سلګونه افغانان اسلامکلا او تایباد ته نژدې په قاچاقي لارو ایران ته د تلو هڅه کوي، ځکه ایران په قانوني ډول د افغانانو د ورتګ لارې محدودې کړي دي. درنې واورې، یخ باران او سختې غرنۍ سیمې دا سفر ډېر خطرناک کړی دی.