ګوګل جیمینای۳ پرو چټک ماډل راوایست

تاند – ګوګل د ۲۰۲۵ کال په نوومبر کې د جیمینای ۳ پرو معرفي کړی و، او اوس یې جیمینای ۳ فلش هم وړاندې کړی دی.

لکه څنګه چې له نوم څخه یې ښکاري، دا د ګوګل د مصنوعي ځیرکتیا (AI) تر ټولو چټک ماډل دی.

دا ماډل په ځانګړې توګه د لوړې چټکتیا لپاره طرحه شوی دی.

په حقیقت کې، ګوګل وایي چې د ډېرو پرامپټونو لپاره د دې کارول د ګوګل لټون (Search) په څېر چټک احساسېږي.

جیمینای ۳ فلش به اوس په جیمینای اپ کې د ډیفالټ ماډل په توګه کار کوي، خو که څوک غواړي جیمینای ۳ پرو وکاروي، نو باید د «Fast» پر ځای د Thinking ماډل وټاکي.

ګوګل ویلي چې جیمینای ۳ پرو لا هم د پرمختللې ریاضي او کوډنګ لپاره تر ټولو غوره انتخاب دی، خو شرکت باور لري چې فلېش ماډل به د نورو ټولو کارونو لپاره تر ټولو اغېزمن ثابت شي.

دا نوی ماډل د جیمینای ۲.۵ فلش په پرتله ډېر ښه شوی دی، او ان په ځینو ازموینو کې د اوپن‌اې‌آی له GPT-5.2 سره برابر بلل شوی دی.

همداراز، جیمینای ۳ فلش د ګوګل سرچ په AI Mode کې هم د ډیفالټ ماډل په توګه ټاکل شوی دی.

د ګوګل په وینا، د AI موډ به اوس د کاروونکو اړتیاوې لا ښه درک کړي، خلک به ترې لا پېچلي پوښتنې کولی شي، او د هماغو پوښتنو مطابق به دقیق او مناسب ځوابونه ترلاسه کړي.