تاند (چهارشنبه د لیندۍ ـ قوس ۲۶مه) پاکستاني رسنیو د خپل هېواد د اقتصادي چارواکو له قوله ویلي، د سوداګریزو لارو له تړلو مخکې پاکستان، افغانستان ته د ورځې له ۵۰ تر ۶۰ میلیون ډالرو صادرات درلودل چې، اوس دا کچه صفر ته رسیدلې ده.
د افغانستان او پاکستان د سوداګرۍ ګډې خونې مرستیال ضیاالحق سرحدي زیاته کړې چې، د لارو په تړل کېدو سره پاکستان تر دې دمه ۴.۵ میلیارد ډالر زیان لیدلی دی.
سرحدي د پاکستان تولیدي سکتور سمنټ، کرنه او درمل هغه برخې یادې کړي چې، په شدت یې زیان لیدلی دی.
دا راپورونه داسې مهال خپرېږي چې، له تېرو څو میاشتو راهیسې د افغانستان او پاکستان ترمنځ د ترنګلتیاوو له امله لارې تړلې دي.
د لارو تر تړل کېدو وروسته طالبانو له پاکستان سره په بشپړ ډول سوداګري ختمه کړه.
اقتصاد پوهان که څه هم د پاکستان له انحصاره د افغانستان د سوداګرۍ پر وتلو خوښ دي خو د لارو او سوداګرۍ پر دوامداره بندېدو خواشیني او دا یې حل لار نه بولي.
دوی وایي، دواړه لوري باید د سوداګرۍ اصولو ته په درناوي لارې پرانيزي او دا شخړه پای ته ورسوي.