تاند ( چهارشنبه د لیندۍ ـ قوس ۲۶مه) د طالبانو د حکومت د عدلیې وزارت وایي، د غصب د مخنیوي کمېسیون په تېرو ۶میاشتو کې ۷۶۱زره جریبه ځمکه دولتي تثبیت کړې او غصب نه یې خلاصه کړې ده.
د یاد وزارت د مالوماتو له مخې، دغه ځمکې په کابل او ۳۳ولایتونو کې تثبیت شوې.
د سرچینې په وینا له غصبه د خلاصو شویو ځمکو په اړه لازمې پرېکړې شوې دي.
یاد وزارت دغه راز زیاته کړې، د بادغیس ولایت مرکز او لس ولسوالیو کې تر ۴میلیونه او ۱۶۷زره جریبه ځمکې د عمومي څړځای په توګه تثبیت شوې دي.
د سرچینې په وینا دغه اقدامات له ځمکو د غصب مخنیوي او دولتي ملکیت د ساتنې په موخه شوی دی.
د غصب شویو ځمکو د خلاصون دا خبر داسې مهال خپرېږي چې، اوس هم په ځینو ولایتونو کې خلک ادعا کوي چې، لوړپوړي چارواکي او د هغوی خپلوان په ډېر مهارت سره دولتي ځمکي غصبوي او پلوري.