تاند ( چهارشنبه د لیندۍ ـ قوس ۲۶مه) د امریکا حکومت د افغانانو لپاره د ځانګړې کډوالۍ ویزې (SIV) ویزو لرونکو افغانانو ورتګ هم لغوه کړ.
افغان ایواک اعلان کړی، چې افغانستان د هغو هېوادونو په لېست کې دی، چې وګړي یې د امنیتي او کډوالۍ دلایلو له مخې امریکا ته د ویزې ترلاسه کولو او کډوالۍ محروم شوي دي.
د دې سازمان مشر، شان وانډ ایور زیاته کړې چې، د امریکا حکومت د یوه افغان له لوري پر ملي ګارد سرتېرو د برید پېښه پلمه ګرځولې، څو افغانستان کې د امریکا پخواني همکاران او د هغوی کورنۍ امریکا ته له ننوتلو منع کړي.
هغه دغه پرېکړه قصدي بللې، چې سمدستي انساني پایلې لري او ټینګار یې کړی، چې د SIV ویزو لرونکي له تر ټولو سختو امنیتي ارزونو تېر شوي دي.
د افغان ایواک مشر همداراز خبرداری ورکړی، چې دا اقدام د امریکا د کډوالۍ له اصولو سره په ټکر کې دی او د زرګونو غوښتونکو د کورنیو د بېلتون او د امریکا د پخوانیو همکارانو د بې باورۍ لامل کېږي.
افغان ایواک د دې حکم د عاجلې بیاکتنې او لغوه کېدو غوښتنه کړې ده.