تاند (دوشنبه، د لیندۍ/ قوس ۲۴ مه) د ایران د باندنیو چارو وزارت نن (دوشنبې) وویل، د تهران په سیمهییزه ناسته کې ګډون کوونکو هېوادونو له طالبانو او پاکستان څخه وغوښتل چې بېرته خبرو اترو ته راوګرځي او خپلې ستونزې له دیپلوماتیکو لارو حل کړي.
د ایران د بهرنیو چارو وزارت د خبرپاڼې له مخې، په دې ناسته کې د روسیې، چین، پاکستان، تاجکستان، ازبکستان، ترکمنستان او ایران ځانګړو استازو د طالبانو او پاکستان ترمنځ د تاوتریخوالي د کمولو د هڅو ملاتړ کړی او چمتووالی یې ښودلی چې د دغو نوښتونو د پیاوړتیا لپاره مرسته وکړي.
دا ناسته د یکشنبې په ورځ په تهران کې جوړه شوې وه. طالبان دې ناستې ته بلل شوي وو، خو له ګډون څخه یې ډډه وکړه.
تر دې وړاندې قطر او ترکیې د افغانستان او پاکستان ترمنځ د جګړې د مخنیوي او اوربند لپاره منځګړتوب کړی او دواړه خواوې یې اوربند ته حاضر کړي وو.
د ایران د باندنیو چارو وزارت د خبرپاڼې پر اساس، ګډونوالو د افغانستان له خاورې د راولاړېدونکو امنیتي ګواښونو په اړه اندېښنه څرګنده کړې او ویلي یې دي چې د ترهګرۍ، مخدره توکو قاچاق او د انسانانو قاچاق پر وړاندې د مبارزې لپاره له افغانستان سره همکارۍ ته چمتووالی لري.
دوی د افغانستان د ثبات پر پیاوړتیا او د سیمهییزو همکاریو پر پراختیا ټینګار کړی، څو له افغانستان سره تړلې ګډې ستونزې حل شي. همدارنګه ځانګړو استازو له نړیوالې ټولنې غوښتي چې پر افغانستان لګېدلي بندیزونه لیرې کړي او د افغانستان کنګل شوې شتمنۍ خوشې کړي.
په ناسته کې د افغانستان په خاوره کې د هر ډول بهرني پوځي حضور مخالفت شوی او ټینګار شوی چې هغه هېوادونه چې د افغانستان د اوسني وضعیت مسوول بلل کېږي، باید د دې هېواد د بیارغونې او اقتصادي رغېدو لپاره مرسته وکړي، پرته له دې چې مرستې د سیاسي فشار د وسیلې په توګه وکاروي.
ګډونوالو له نړیوالو سازمانونو هم غوښتي چې د ګاونډیو هېوادونو څخه د افغان کډوالو د بېرته ستنېدو ملاتړ وکړي او د هغوی د باعزته او دوامدار ادغام لپاره لازم شرایط برابر کړي.
د ایران د بهرنیو چارو وزارت ویلي چې ګډونوالو هوکړه کړې د افغانستان د ګاونډیو هېوادونو د بهرنیو چارو وزیرانو پنځمه ناسته به تر ممکنه حده ژر تر ژره د ترکمنستان په پلازمېنه عشقآباد کې جوړه شي.
د تهران غونډه؛ عراقچي: د افغانستان امنیت د سیمې د ټولو هیوادونو له ګټو سره تړلی