تاند ( شنبه د لیندۍ ـ قوس ۲۲مه) د افغانستان له ۱۹ کلنې کم عمره کرکټ ملي لوبډلې د ځوانانو په اسیاجام کې خپله لومړۍ لوبه بنګله دېش ته وبایلله.
افغان نوولس کلنو ځوانانو په ټاکلو ۵۰ اورونو کې د ۷ لوبغاړو په زيان بنګله دېش U19 ته د ۲۸۴ منډو هدف وټاکه.
د افغان لوبډلې په ګټه فيصل خان شينوزاده ۱۰۳، عزير الله نيازي ۴۴، عزيز الله مياخېل ۳۸*، عثمان سادات، ۳۴ او عبدالعزيز ۲۶* منډې جوړې کړې.
افغان لوبډلې د هدف په دفاع کې ښه توپ اچونه وکړه او د سیالې لوبډلې ۷ لوبغاړي یې له ډګره بهر کړل، خو سیالې لوبډلې په پای کې د ۳ ویکټو په توپیر بریا خپله کړه.
افغان لوبډله به د راتلونکې دوشنبې په ورځ د یادو سیالیو په لړ کې د خپلې دویمې لوبې لپاره د سریلانکا پر وړاندې د سیالۍ ډګر ته ښکته شي.