تاند ( چهارشنبه د لیندۍ ـ قوس ۱۹مه) د طالبانو د حکومت د عامې روغتیا وزیر مولوي نور جلال جلالي وايي چې، په روان ۲۰۲۵ زېږدیز کال کې په ټول هیواد کې د ګوزڼ ناروغۍ نهه مثبتې پېښيې ثبت شوي دي.
جلالي په ځینو سیمو کې یې د واکسین پر وړاندې منفي ذهنیت یوه اصلي ستونزه یاده کړې ده.
طالب وزیر مولوي نور جلال جلالي نن (چهارشنبه) په کابل کې د رسنیو له پاره د پولیو ناروغۍ پر وړاندي د عامه پوهاوي او همږغۍ غونډې ته ویلي چې، د دغو پېښو له جملې یې یوه په ختیځه او پاتې نور یې د هیواد په نورو سیمو کې ثبت شوي دي.
جلالي په یاده غونډه کې د ګوزڼ ناروغۍ له پاره د عامه پوهاوي یادونه وکړه او په نبوي طب کې یې هم د هغه پر اهمیت تینګار وکړ.
په یاده غونډه کي د ملګرو ملتونو د کوچنیانو د ملاتړ د صندوق استازي علي صلاح هم د پولیو د له منځه وړلو له پاره پر عامه پوهاوي ټینګار کړی او په وینا یې، عامه پوهاوی او سم معلومات نشرول کولای شي د یوه کوچني ژوند وژغوري.