تاند ( چهارشنبه د لیندۍ ـ قوس ۱۹مه) هرات ولایت کې د طالبانو د امنیه قوماندانۍ د نشه يي توکو پر ضد د مبارزې برخې مسوولانو ویلي، د طالبانو دبیا واکمنېدو راهیسې په هرات ولایت کې شاوخوا ۳۵ زره روږدي راټول او درملنه یې شوې ده.
هرات کې د طالبانو د حکومت د مخدره توکو پر وړاندې د مبارزې مدیر مولوي حیات الله روحاني رسنیو ته ویلي، هره اونۍ د روږدو بستریز کمپ څخه له ۱۰۰ ډېر رغېدلي روږدي خپلو کورنیو سره یوځای کیږي.
نوموړي ویلي، ټولنې ته د روغو کسانو د بېرته ستنېدو په موخه دغو کسانو ته د درملنې په مهال مسلکي روزنه هم ورکول کیږي.
مسوولان وایي چې، دوی د روږدو کسانو راټولولو او درملنې پروسه په جدي ډول پیل کړې او هڅه کوي تر لومړنیو مرحلو وروسته په مسلکي او تخنیکي برخو کې زده کړې ورکړل شي.