تاند (چهارشنبه، د لیندۍ/ قوس ۱۹ مه) د ملګرو ملتونو د امنیت شورا نن (د دسمبر ۱۰مه)، چې د بشري حقونو له نړیوالې ورځې سره هممهاله ده، په نیویارک کې د افغانستان په اړه خپله درې میاشتنۍ علني ناسته دایروي.
په دې غونډه کې به د یوناما او د ملګرو ملتونو د بشري مرستو د همغږۍ دفتر (OCHA) استازي د افغانستان د سیاسي، امنیتي او بشري وضعیت تازه راپور وړاندې کړي.
تمه ده چې د ملګرو ملتونو چارواکي په افغانستان کې د روانو ستونزو، د بشري اړتیاوو د پراخوالي، او له افغانستان سره د نړیوال تعامل پر اړخونو خبرې وکړې.
د چارو ځینې شنونکي وايي، د دې ډول ناستو ګټه دا ده چې د افغانستان مسئلو ته د نړیوالې ټولنې، بېلابېلو هېوادونو، په ځانګړي ډول د نړۍ د ځواکمنو دولتونو پام واوړي.
که څه هم غونډه د افغانستان د وضعیت په اړه ده، خو د دې لپاره چې د طالبانو حکومت، چې نړیوالو په رسمیت نه دی پېژندلی خو عملاً د افغانستان د خاورې بشپړ کنټرول په لاس کې لري، په دې ناسته کې د تېرو کلونو په شان ګډون نه لري.
له بلې خوا، دا ناسته په داسې حال کې ترسره کېږي چې ملګرو ملتونو لاهم په رسمي ډول د یوناما نوی مشر نه دی ټاکلی، او د دې ماموریت د راتلونکي لوري په اړه پوښتنې راپورته کېږي.
په عین حال کې دا غونډه په داسي وخت کې جوړېږي چې د ښځو په اړه د طالبانو د حکومت تبعیضي اقدامات زیات شوي. تېره اوونۍ یوناما له طالبانو وغوښتل چې د ملګروملتو ښځینه کارکوونکو ته اجازه ورکړي چې کار ته حاضرې شي. دا مسله ممکن د دې سبب شي چې د امنیت شورا غونډه د تېرو کلونو په شان بیا هم د طالبانو په مزاج برابره نه وي.
د دې ترڅنګ له دې غونډې سره تقریباً هممهاله د افغانستان او پاکستان ترمنځ ترینګلتیاوې زیاتې شوي، د مرسته کوونکو ادارو بودجې په خورا کچه کمې شوي، د میلیونونو افغان کورنیو اقتصادي حالت ورځ تر بلې خرابېږي، او د بشري حقونو – په ځانګړي ډول د ښځو او نجونو د حقونو – په اړه نړیوالې اندېښنې مخ په ډېرېدو دي. ټول دغه عوامل افغانستان یو ځل بیا د نړیوالو بحثونو په مرکز بدلوي.