تاند ( یکشنبه د لیندۍ ـ قوس ۱۶مه) د طالبانو د حکومت ستري محکمې ویلي چې، په خوست ولایت کې یې ۳۴ کسان په عام محضر کې په دُرو وهلي دی.
د طالبانو د حکومت یادي محکمې په یوه خبرپاڼه کې ویلي چې، دغه کسان یې نن (یک شنبه) د همدې ولایت په مرکزي ورزشي لوبغالي کې د خلکو تر مخ له ۱۰ څخه تر ۳۹ دُرې وهلي دي.
خبرپاڼه زیاتوي چې، دغه کسان د دُرو وهلو ترڅنګ له یوه کال څخه تر اوو کلونو په تنفیذي بندونو هم محکوم شوي دي.
په خبرپاڼه کې راغلي چې، یاد کسان د جعلکارۍ او نشه يي توکو د خرڅولو او قاچاق په تور په یادو سزاوو محکوم شوي دي.
د طالبانو سترې محکمې تېره اوونۍ په خوست کې یو کس د قتل په تور په یاد لوبغالي کې قصاص کړ چې سخت غبرګونونه یې هم درلودل.