تاند ( یکشنبه د لیندۍ ـ قوس ۱۶مه) د پښتون ژغورنې غورځنګ (PTM) د اروپا همغږۍ کمېټې ویلي چې، نن د ډیسمبر پر اوومه په برتانیا کې د یوې لويې جرګې چمتووالی شوې ده.
د PTM د غړو په وینا، په دې جرګه کې به د خیبر قامي جرګې له پرېکړو ملاتړ، د افغان نجونو د زده کړو حق، د ښځو د کار اجازه او پر غورځنګ د پاکستان د ناحقه بندیزونو په اړه بحث وشي.
د جرګې تنظیموونکو ویلي، دغه راز به د پښتنو پر وړاندې روانې ټولنیزې، اقتصادي او امنیتي ستونزې او پر افغان خاوره د پاکستان وروستي هوايي بریدونه غندل د جرګې مهم موضوعات وي.
د پښتون ژغورنې غورځنګ اروپا څانګې په برتانیا او نورو اروپايي هېوادونو کې مېشتو افغانانو ته بلنه ورکړې چې په دې “تاریخي جرګه” کې ګډون وکړي.
هغه افغانان پښتانه چې د فزیکي ګډون توان نه لري، ترې غوښتل شوي چې د ټولنیزو رسنیو له لارې د غونډې ملاتړ وکړي.