تاند ( دوشنبه د لیندۍ ـ قوس ۱۰مه) بلوچستان کې د پاکستان ضد وسلوالې ډلېو د بلوچستان د ازادۍ پوځ د دې صوبې په نوشکۍ سیمه کې د پاکستان د امنیتي ځواکونو پر مرکز د ځانمرګي برید مسوولیت ومانه.
دغه برید تېره شپه ناوخته د پاکستاني ځواکونو د مرکز په دروازه کې په ځانمرګي پسې پیل شو.
ورپسې درې وسلوال د سرحدي ځواکونو مرکزي دفتر ته ننوتل او جګړه یې پیل کړه.
په سیمه کې د پاکستان امنیتي ځواکونه دا برید مني، خو خپل لور ته اوښتې مرګ ژوبلې په هکله یې څه نه دي ویلي.
تر دې پېښې مخکې پرون د بلوچستان په مختلفو سیمو کې د پاکستان پر امنیتي ځواکونو په څلورو سیمو کې برید شوی و.
د یوه بل خبر له مخې د پښتونخوا په کورمه کې وسلوالو بېګا شپه د پاکستان د پولیسو پر تاڼه برید کړی چې له امله یې دوه پولیس وژل شوي او شپږ ټپیان دي.
د سیمې ځايي چارواکي د دې پېښې تایید سره وايي چې ځوابي برید کې یې څلور وسلوال هم وژلي دي.
برید د منځنۍ کورمې صدې ته څېرمه په څینارک کې د پولیسو پر تاڼه شوی دی.
د پاکستان ضد وسلوالو یو غږ خپلو ملګرو ته لېږلی چې پکې ادعا کوي تاڼه یې نیولې او د پولیسو شل میله سپکه وسله په لاس ورغلې ده.
دوی خپل لور ته د مرګ ژوبلې اوښتو ادعا هم ردوي.