تاند (جمعه، د لیندۍږ قوس ۷ مه) د تاجیکستان په جنوب ختیځ کې لږ تر لږه درې چینایي کارکوونکي هغه مهال ووژل شول چې د ځايي چارواکو په وینا د یوې بې پېلوټه الوتکې له لوري پرې برید وشو.

تر دې مخکې پرون تاجک چارواکو ویلي و چې یوې جنایتکارې ډلې د افغانستان پولې ته څېرمه پر چینايي کارکوونکو برید کړی چې له کبله یې درې کارکوونکي وژل شوي دي.

تاجک چارواکي عموماً د مخدرو موادو قاچاقبرو ته د جنایتکار کلمه کاروي.

تاجک سرچینې وايي دا برید د افغانستان له خاورې په یوه همغږې شوې حمله کې شوی، چې پکې هم وسله والو او هم ډرون الوتکې برخه لرله.

برید د چهارشنبې په ورځ د تاجکستان په ختلان سیمه کې شوی او تاجک چارواکي د افغانستان د طالبانو له حکومته غواړي چې د بریدګرو خلاف کلک اقدامات وکړي.

 وژل شوي کسان د یوې چینایي کمپنۍ (LLC Shohin SM) هغه کارکوونکي وو چې د تاجکستان او افغانستان پولې ته نژدې په یوه پروژه کې بوخت وو.

دا برید په داسي مهال شوی چې د افغانستان د بدخشان والي ته په تاجکستان کې تود هرکلی وویل شو او تر هغه وړاندې د تاجکستان یو جګپوړی پلاوی کابل ته راغی چې د دوو هیوادونو ترمنځ د اړیکو د تودېدو نښه وبلله شوه.

دې ته په کتو په تاجکستان کې برید ممکن د هغو کړیو او هیوادونو کار وي چې د افغانستان او تاجکستان د اړیکو په نژدې کېدو اندېښمن دي.

په تاجکستان کې ګڼې چینايي کمپنۍ، په ځانګړي ډول د دغه هیواد په کانونو کې په کار بوختې دي.

افغانستان او تاجکستان په خپل منځ کې ۱۳۵۰ کیلومتره پوله لري.