تاند (جمعه، د لړم/ عقرب چین اعلان کړی چې د سرو زرو تر ټولو ستره زېرمه یې په لیاؤنینګ ولایت کې کشف کړې ده.
د چینايي چارواکو په وینا، دا ، له ۱۹۴۹ کال راهیسې په دې هیواد کې د سروزرو تر ټولو لویه موندل شوې زېرمه ده.
د دې زېرمې اندازه شاوخوا ۱۴۴۴ ټنه اټکل شوې ده. دا کشف په داسې وخت کې شوی چې د سرو زرو په نړیوالو قیمتونو کې بېساری زیاتوالی راغلی دی.
د چین د طبیعي سرچینو وزارت د جمعې په ورځ د «دادونګګو» د سرو زرو د زېرمتون کشف تایید کړ.
چارواکي وايي دغه کان شاوخوا ۲.۵۸۶ میلیون ټنه کاني تیږې لري چې په هر ټن کې د سرو زرو اوسط عیار ۰.۵۶ ګرامه دی، چې ټولټال ورڅخه نژدې ۱۴۴۴ ټنه سره زر جوړېږي.
که څه هم چارواکو د کان دقیق موقعیت نه دی افشا کړی، یوازې یې ویلي چې دا د لیاؤنینګ ولایت په ختیځ کې دی؛ هغه اقدام چې د ستراتیژیکو او امنیتي ملاحظاتو په اړه اوازې زیاتوي.
د چین د سرو زرو نوی کشف او د سرو زرو لوړې بیې
دا کشف په داسې وخت کې شوی چې په چین کې سرو زرو ته تقاضا بېساري لوړه شوې ده. د ډالر د ارزښت ټیټوالي، جیوپولیټیکي کړکېچونو او د مرکزي بانکونو پراخې پیرودنې له امله سږ کال د سرو زرو بیه له ۵۰٪ لوړه شوې ده.
چین په وروستیو کلونو کې د کانونو د اکتشاف چټک کړی دی:
- په ۲۰۲۴ کال کې یې په هونيان ولایت کې له ۱۰۰۰ ټنو څخه زیاتې زېرمې کشف کړې.
- همداراز د اکتوبر میاشت کې په ګانسو ولایت کې له ۴۰ ټنو څخه زیاتې زېرمې وموندل شوې.
چین په ۲۰۲۴ کال کې ۳۷۷.۲۴ ټنه سره تولید کړي، چې د تېر کال په پرتله یې ۰.۵۶٪ وده ښيي.
د کورني مصرف کچه هم لوړه شوې — یوازې په ۲۰۲۴ کې چین د سرو زرو ۹۸۵.۳۱ ټنه خښتې مصرف کړي، په داسې حال کې چې د سرو زرو په ټوټو او سکو کې پانګونه ۲۴٪ زیاته شوې ده.
شنونکي وايي دا لړۍ د چین د منځني قشر د زیاتېدو ښودنه کوي چې غواړي د خپل مال ارزښت د نړیوالې اقتصادي بېثباتۍ په شرایطو کې وساتي، او له همدې امله سره زر په چین کې د خوندي پانګونې تر ټولو محبوبه وسیله ګرځېدلې ده.
د ۱۶۶ میلیارد یورو په ارزښت د سرو زرو زیرمه
د اوسني نړیوال قیمت له مخې، دا ۱۴۴۴ ټنه سره شاوخوا ۱۶۶ میلیارد یورو ارزښت لري. د سرو زرو نرخ سږ کال د هر کیلو لپاره تر ۱۱۵ زرو یورو هم پورته شوی دی.
د سرو زرو دا ستره زېرمه د«لیاؤنینګ د جیولوجي او کانونو دولتي ګروپ» کشف کړې ده. په دې ګروپ کې نژدې ۱۰۰۰ متخصصان او کارګران شامل وو. ټول اکتشافي عملیات یوازې په ۱۵ میاشتو کې بشپړ شول — چې د دومره لوی زېرمتون لپاره بېساری چټک وخت بلل کېږي.
د چین د طبیعي سرچینو وزارت دغه زېرمتون «په غیرعادي ډول ستر» بللی او ویلي یې دي چې دا پروژه له لومړنۍ اقتصادي ارزونې هم بریالۍ وتلې ده.