تاند (چهارشنبه د لړم ـ عقرب ۲۱مه) ‏د افغانستان ریاست الوزرا‌ اقتصادي مرستیال ملا عبدالغني برادر اخوند له افغان سوداګرو سره په ګډه ناسته کې ویلي، د هېواد ټول صنعتکاران او سوداګر دې د پاکستان پر ځای نورې بدیلې لارې غوره کړي.

ملا عبدالغني برادر اخوند مالیې وزارت ته لارښوونه کړې، چې پاکستان څخه واردېدونکي درمل محصول نه کړي او هیچاته یې د واردولو اجازه هم ورنه کړي.

ملا برارد اخوند پاکستان کې قراردادي شرکتونو او هغو کسانو ته چې هلته یې خریداري کړې درې میاشتې وخت ورکړ چې، دې موده کې خپل حسابونه تصفیه او کار دې را ونغاړي.

برادر زیاته کړې پاکستان د لارو په تړلو سره بشري او سوداګریزو مواردو څخه سیاسي استفاده کوي او له صنعتکاراتو او سوداګرو یې غوښتي، چې ژر تر ژره د صادراتو او وارداتو بدیل انتخابونه عملي کړي.

نوموړي د افغانستان روغتیایي سکټور د ستونزو اصلي لامل له پاکستان څخه د میلیونونو ډالرو په ارزښت د بې کیفیته درملو واردول بللي او له سوداګرو یې په کلکه غوښتنه کړې، خپل واردات له نورو لارو او هېوادونو ترسره کړي.

برادر ټینګار کړی، چې پاکستانی لوری باید د لارو خلاصون برخه کې داسې تضمینونه ورکړی، چې په هیڅ ډول حالاتو او شرایطو کې بیا ونه تړل شي.