تاند (چهارشنبه د لړم ـ عقرب ۲۱مه) د افغانستان د ټولګټو چارو وزارت وایي، د سالنګ قیر اچونې کارونه یې د کانکریټي برخو د مقاومت دوام او ساتنې په موخه پیل کړي چې د ۱۵ګالرۍ کارونه بشپړ شوي دي.
د یاد وزارت ویاند محمد اشرف حق شناس ویلي، دا مهال د سالنګ د بیارغونې چارې بېلابېلو برخو کې په چټکۍ سره دوام لري.
نوموړي زیاته کړې، شمالي او جنوبي سالنګ کې د کانکریت اچونې او محافظتي لایې کارونه هم دوام لري، چې د سږ کال پلان شوي کارونه به د ژمي تر را رسېدو بشپړ کړي.
د نوموړي په خبره، د دغې لویې لارې د بیارغونې چارې یو شمېر برخو کې پای ته رسېدلې چې، د تګ راتګ پر مهال یې ګڼې اسانتیاوې برابرې کړې دي.
سالنګ لویه لاره د هېواد له مهمو اقتصادي مسیرونو څخه ده، چې د هېواد شمال له سویل سره نښلوي، چې د بیارغونې چارې یې د ټولګټو وزارت له لوري پیل شوې دي.