تاند (دوشنبه د لړم ـ عقرب ۱۲مه) د طالبانو برېښنا شرکت وايي، د تاجکستان وارداتي برېښنا چې تېره شپه شمالي ولایتونو کې د زلزلې له امله یې مزي پرې شوي وو، بېرته ونښلول شو.
د برېښنا شرکت د اعلامیې له مخې د تاجکستان وارداتي برېښنا په بیا نښلیدو د کندز، تخار او بغلان ځېنو سیمو کې د پېرودونکو برېښنايي ستونزې حل شوې او خلک د پخوا په څېر په عادي ډول برېښنا ته لاسرسی لري.
د افغانستان برېښنا شرکت همداراز لیکلي، کارکوونکي یې ساحو کې په کار بوخت دي تر څو عمومي شبکه ژر نورماله کړي.
په یاده زلزله کې د برېښنا د مزو د پرې کېدو ترڅنګ سلګونه کسانو ته هم مرګ ژوبله اوښتې ده.
ژغورونکې ډلې لاهم سیمه کې د مړو د موندلو او ژوبلو د ژغورلو په عملیاتو بوخت دي.