تاند (شنبه د لړم ـ عقرب ۱۰مه) افغان سوداګر میرویس عزيزي د فوټسال د ۱۷ کلنو ملي لوبډلې لوبغاړو ته یو میلیون افغانۍ د جایزې په توګه ټاکلې دي.
نوموړي د دې کار موخه د فوټسال ملي لوبډلې د لوبغاړو تشویق بللی.
عزیزي په اسیاجام سیالیو کې د فوټسال ملي لوبډلې د بریا له امله افغان ولس ته مبارکي ویلې ده.
بل لورته د کرکټ ملي لوبډلې ستوري، راشد خان هم د هېواد د ۱۷ کلنو د کم عمره فوټسال ملي لوبډلې د آسیا اتلولۍ د ګټلو مبارکي ویلې ده.
راشد خان ویلي، افغانستان اوس د آسیا د فوټسال د ۱۷ کلنو د [کم عمره] لوبډلو اتل دی.
د فوټسال د آسیا د ۱۷ کلنو د کم عمره لوبډلو د اتلولۍ پایلوبه وړمه ورځ ترسره شوه، چې افغان لوبغاړو ایرانۍ لوبډله ماته او د فوټسال آسیا جام اتلولي یې خپله کړه.
د یادونې وړ ده چې، له ۱۷ کلنو کم عمره افغان ملي لوبډله نن شنبه تر تاریخي بریا وروسته هېواد ته راستنه شوه، چې خلکو او د ورزش مینه والو یې تود هرکلی وکړ.