تاند ( یکشنبه د لړم – عقرب ۱۱مه) پاکستانۍ رسنۍ وایي د شنبې په ورځ یوازې د چمن له لارې ۱۰ زره او ۷۰۰ افغان کډوال افغانستان ته اوښتي او دغه بهیر راز دوام لري.
د مالوماتو له مخې دغه کورنۍ د لارې په اوږدو کې په موټرو کې له خپلو کډو سره شاوخوا ۲۰ ورځې پرته له هېڅ ډول امکاناتو تېرې کړې وې.
له دې سره سم، پرون(شنبه د لړم ۱۰مه) د تورخم لاره هم یوازې د افغان کډوالو د راستنېدو پر مخ خلاصه شوه او ورسره زرګونه کورنۍ بېرته افغانستان ته ستنې شوې دي.
تر دې مخکې په پېښور کې د طالبانو کونسل محبالله شاکر ویلي و، د افغان کډوالو له کډو بار سلګونه موټر له نوښار څخه تر تورخم پورې د سړک پر غاړه په سختو شرایطو کې ولاړ او د تورخم دروازې خلاصون ته په تمه دي.
هغه له پاکستاني چارواکو غوښتي و، چې په لارو کې په تمه ولاړو افغان کډوالو ته د سرپناه، اوبو او خوراکي توکو زمینه برابره کړي.
دغه لارې د افغانستان او پاکستان ترمنځ تر ناندریو او جګړو وروسته وتړل شوې، چې ۲۱ ورځې وروسته یوازې د راستنېدونکو کډوالو پرمخ پرانیستل شوې.
د دې لارې له تړل کېدو سره دواړه غاړه افغان سوداګر هم هره ورځ میلیونونه زیان ګالي.