تاند (جمعه د لړم ـ عقرب ۹مه) د افغانستان او زمبابوې کرکټ ملي لوبډلو ترمنځ د کرکټ د دوه اړخیزې لوبلړۍ په دویمه سیالۍ کې هم افغان لوبډلې کوربه لوبډلې ته په ۷ وېکټو ماته ورکړه.
زمبابوې لوبډلې د پچې په ګټلو سره لومړی توپ وهنه وکړه او د ټولو لوبغاړو په سوځېدو یې افغانستان ته د ۱۲۶ منډو هدف ورکړ.
افغان لوبډلې دغه هدف په ۱۸ اورونو کې د ۳ لوبغاړو په سوځېدو پوره او سیالې لوبډلې ته یې په دویمه لوبه کې هم ماته ورکړه.
افغانستان په دې سره په روانې لوبلړۍ کې د زمبابوې پر وړاندې ۲ صفر مخکې ده.
د افغان لوبډلې له اړخه ابراهیم ځدران ۵۷ ناسوځېدلې او عظمت الله عمرزي ۲۵ ناسوځېدلې منډې وکړې.
د افغانستان او زمبابوې ترمنځ د روانې دوه اړخیزې لوبلړۍ درېیمه لوبه د راتلونکې نومبر میاشتې په دویمه نېټه د یکشنبې په ورځ ترسره کېږي.