تاند (یکشنبه د لړم ـ عقرب ۴مه) د افغان سولې لپاره د امریکا پخواني ځانګړي استازي زلمي خلیلزاد د پاکستان د دفاع وزیر خواجه اصف هغه څرګندونې چې د طالبانو پر ضد د جګړې ګواښ یې کړی، د ډېرو بې پروا او خطرناکو څرګندونو په توګه یادې کړې دي.
خلیلزاد ویلي، خواجه اصف د افغانانو په دښمنۍ کې مشهور دی.
هغه د پوښتنې په توګه ویلي: «ایا دا سمه ده چې د یوه شخص احساسات دې پاکستان د یوې ویجاړونکې جګړې پر لور بوځي؟»
نوموړي جګړه د طالبانو او پاکستان ترمنځ د دواړو خواوو لپاره د بایلات لوبه بللې او ټینګار یې کړی چې دواړه لوري باید له نښتو ډډه وکړي.
خلیلزاد ډېپلوماسي، خبرې اترې او له یو بل سره رغنده ګاونډیتوب د طالبانو او پاکستان لپاره غوره لارې بللې دي.
د خلیلزاد دا څرګندونې د پاکستان د دفاع وزیر خواجه اصف د هغو خبرو په ځواب کې دي، چې ویلي یې و: «که خبرې اترې پایله ورنه کړي، اسلام اباد به له طالبانو سره مخامخ جګړه پیل کړي.»