تاند (پنجشنبه د لړم ـ عقرب لومړۍ) د طالبانو د کډوالو او راستنیدونکو چارو وزیر مولوي عبدالکبیر د افغانستان لپاره د برېټانیا له ځانګړي استازي ریچارډ لیندسي سره کتنه کې ویلي، د کډوالو او اړمنو د لاسنیوي په موخه یې خپل ټول امکانات کارولي دي.
مولوي عبدالکبیر ویلي، افغان کډوالو او اړمنو ته یې د لنډ مهاله مرستو سربېره د دایمي سرپنا په موخه ګڼ ښارګوټي په نظر کې نیولي چې دا مهال یې پر ځينو کار روان دی.
د طالبانو د کډوالو چارو وزیر راستنیدونکو لپاره د ښارګوټو په جوړولو کې د نورو مرستندویه هېوادونو په ګډون د برېټانیا مرستې هم مهمې بللي.
د افغانستان لپاره د برېټانیا ځانګړي استازي بیا په دې برخه کې د طالبانو هڅې او لاسته راوړنې بریالۍ ګڼلې او ختیځ کې زلزله ځپلو سره د مرستې لپاره یې د څلور میلیونه پونډو مرستې اعلان کړی.
ریچارد لیندسي همداراز افغانانو سره د بشري مرستو د دوام ژمنه وکړه او د افغانستان او پاکستان ترمنځ یې د اوربند ستاینه وکړه.