تاند (پنجشنبه د تلې ـ میزان ۲۴مه) په افغان سوله کې د امریکا پخواني ځانګړي استازي زلمي خلیلزاد ویلي، چې د افغانستان او پاکستان ترمنځ موقت اوربند د دیپلوماسۍ لپاره ښه فرصت دی.
خلیلزاد دا اقدام یو غوره اقدام بللی دی.
خلیلزاد داسې مهال دا څرګندونې کړي چې، له بلې د طالبانو د حکومت ویاند ذبیح الله مجاهد وايي، د پاکستان له پرله پسې غوښتنو وروسته یې له دغه هېواد سره پر ۴۸ ساعته اوربند هوکړه وکړه.
نوموړی وايي، خپلو ټولو سرتېرو ته یې امر کړی، چې د اوربند اصولو ته غاړه کېږدي او د هر ډول حالاتو لپاره چمتو اوسي.
مجاهد خبرداری ورکړی، که پاکستاني پوځیان له اوربند سرغړونه وکړي سخت ځواب به ورکړي.
په همدې حال د پاکستان پوځ ادعا کړې، چې د طالبانو په مکررو غوښتنو یې ۴۸ ساعته اوربند منلی دی.
دا په داسې حال کې ده چې له تېرو پنځو ورځو راهیسې د طالبانو او پاکستاني پوځیانو ترمنځ په ځنډني ډول نښتې روانې دي، چې دواړه لوري یو بل ته د درنې مرګ ـ ژوبلې اړولو ادعاوې کوي.