تاند (پنجشبه، تلې/ میزان ۲۴ مه) د بهرنیو چارو وزیر امیر خان متقي د هند له اووه ورځنۍ سفر وروسته پرون (چهارشنبې) کابل ته راستون شو.
ښاغلي متقي د خپل سفر په وروستۍ ورځ، د شیخالهند مولانا محمود حسن له کورنۍ سره ولیدل — هغه نوموتی هندي عالم چې د بریتانیايي استعمار پر ضد د هند د مبارزې له مخکښو شخصیتونو څخه ګڼل کېږي.
متقي د دې لیدنې پر مهال وویل:
«هغه اسلامي کتابونه چې دلته په هند کې تدریس کېږي، موږ یې په افغانستان کې عملي کوو.»
هغه زیاته کړه:
«هغه نصابونه چې د هند علما یې دلته لولي، په افغانستان کې یې عملي تطبیق روان دی.»
څرګنده نه ده چې د محمود حسن منظور د ښځو د کار او د نجونو د زده کړو مخنیوی و او که د جرمونو مخنیوی. طالبان د جرمونو، رشوت او غلاوو په مخنیوي کې بریالي دي خو د نجونو د زده کړو او د ښځو د کار په شان په یو لړ مسایلو کې له سختو انتقادونو سره مخامخ دي. همدا انتقادونه سبب شوي چې د دوی حکومت کورنی او نړیوال مشروعیت ترلاسه نه کړي.
د شیخالهند د کورنۍ غړو د امیر خان متقي هرکلی وکړ. متقي وویل چې د اسلامي نظام د جوړېدو هغه خوب، په ځانګړي ډول په کابل کې، اوس پوره شوی دی.
هغه وویل:
«موږ خوشحاله یو چې د افغانستان او د هند د مسلمانانو، په ځانګړي ډول د دیوبند دارالعلوم له علماوو سره، ژوره او تاریخي اړیکه شته. هیله لرو دا اړیکې لا پیاوړې شي.»
د شیخالهند د کورنۍ یوه غړي وویل:
«هغه څه چې تاسو پرې خبرې کوئ، موږ یوازې په کتابونو کې لوستي وو — د داسې اسلامي نظام په اړه لکه د حضرت ابوبکر صدیق (رض) په زمانه کې. اوس موږ دا ډول حکومت په خپلو سترګو وینو. ډېر اسلامي هېوادونه شته، خو موږ تر دې مخکې د سیاسي اسلام عملي بڼه نه وه لیدلې.»