تاند (سې شنبه، د تلې/ میزان ۱۵ مه) د ټولګټو وزارت په یوه خبرپاڼه کې ویلي چې د ترانسپورټ د ښهوالي او د خلکو د تګ راتګ د اسانتیا لپاره د ۱۴۵ میلیون افغانیو په لګښت د غزني ــ شرنې د ۴۱ کیلومتره سړک د بیا رغونې چارې پیل شوې دي.
د یاد وزارت د معلوماتو له مخې، دغه سړک د غزني ښار له ترانسپورټ څلورلارې څخه تر د بند سردې سیمې پورې غځېدلی او پکې به د سړک بشپړ قیرکول، د ۳۶ پلچکونو ترمیم، او د سړک د غاړو پیاوړتیا شامله وي.
تمه ده دا پروژه په یوه کال کې بشپړه شي.
له بشپړېدو وروسته به دغه سړک نه یوازې د غزني او پکتیکا ولایتونه په اغېزمن ډول سره ونښلول شي، بلکې د دهیک، اندړ او ګیرو ولسوالیو اوسېدونکو ته به هم د تګ راتګ او د کرنیزو او سوداګریزو توکو د لېږد په برخه کې د پام وړ اسانتیاوې برابرې شي.