تاند (سې شنبه، د تلې/ میزان ۱۵ مه) د (میلټري) ویبپاڼې د راپور له مخې، د طالبانو د هوايي ځواک د تخنيکي قطعې انجنيرانو درې  څرخکې بېرته ترميم کړې او فعالې کړې دي.

د افغانستان دفاع وزارت په يوه خبرپاڼه کې ويلي چې ترميم شوې الوتکې دوه Mi-17 څو منظوري څرخکې او يوه MD-530 سپکه جنګي څرخکه ده. د وزارت د معلوماتو له مخې، دغو درېيو څرخکو لازم تخنيکي ازموينې بريالۍ تېرې کړې او تر ترميم وروسته يې لومړنۍ الوتنې په برياليتوب سره ترسره کړې دي.

د روان کال د سپتمبر په مياشت کې يوهMi-17 څرخکه په افغانستان کې د یوه غره په لمنه کې ولوېده. طالبانو هغه وخت تأييد کړه چې په الوتکه کې د دوی يو شمېر چارواکي سپاره وو. دا هیلي کوپترونه طالبانو وروسته له هغه ترلاسه کړل، چې په ۲۰۲۱ کال کې واک ته ورسېدل او د پخواني حکومت د هوايي ځواک تجهيزات یې ونيول.

په وروستيو کې هم راپورونه خپاره شول، چې طالبانو د هند له‌خوا افغانستان ته ورکړل شوې Cheetal څرخکې بېرته فعالې کړې دي. هند د افغانستان له جمهوري حکومت سره د ښو اړيکو د جوړولو په موخه، د «هندوستان هوايي صنايعو شرکت (HAL)» له‌خوا په ۲۰۱۴ کال کې درې Cheetal  هیلي کوپترونه افغانستان ته ورکړي وو.

دغه الوتکې د فرانسې د Aerospatiale SA-315 Alouette II د جواز لاندې جوړ شوي HAL Cheetah ماډل پرمختللې بڼې دي. د بنسټيزې Cheetah په پرتله، چې د زړې 550 اسه ځواک Artouse IIIB انجن لري، Cheetal بڼه د نوې او اقتصادي Turbomeca TM333-2M2 انجن په وسيله چلول کېږي، چې 1100 اسه ځواک لري.

همدارنګه، د جون په مياشت کې طالبان وتوانېدل څو د امريکايي ځواکونو له‌خوا تخريب شوې UH-60A Black Hawk څرخکې هم تر يوه حده ورغوي.

د Scramble Magazine د راپور له مخې، د ۲۰۲۱ کال د سپتمبر تر ۲۷مې نېټې پورې، طالبانو لږ تر لږه ۱۶ بلک هاوک څرخکې او د هغوی روزنيز سمولېټرونه په بېلابېلو تخنيکي حالاتو کې نيولي وو.