تاند (شنبه، د تلې/ میزان 14مه) هند د جمعې په ورځ تایید کړه چې د ملګرو ملتونو د امنیت شورا کمېټې ذ طالبانو د بهرنیو چارو وزیر او د طالبانو جګپوړی غړی مولوي امیرخان متقي ته د معافیت اجازه ورکړې ده څو د اکتوبر له ۹مې تر ۱۶مې پورې نوي ډېلي ته سفر وکړي.
د هند د بهرنیو چارو وزارت ویاند رندیر جایسوال وویل چې دا معافیت شته، خو د سفر جزئیات یې شریک نه کړل او زیاته یې کړه چې رسنۍ به وروسته تازه معلومات ترلاسه کړي.
متقي چې پر سفر یې له ۲۰۰۱ کال راهیسې د ملګرو ملتونو له لوري بندیز دی، تمه کېږي چې د اکتوبر په ۹مه یا ۱۰مه نوي ډیلي ته ورسېږي.
دغه سفر د یوې مهمې ډیپلوماټیکې پېښې په توګه کتل کېږي، ځکه چې هند تر اوسه د طالبانو رژیم په رسمیت نه دی پېژندلی، خو د جمعې په ورځ یې هغه د «افغان بهرنیو چارو وزیر» په نوم یاد کړ.