تاند (شنبه، د تلې/ میزان 12 مه) د ملګرو ملتونو د خوړو او کرنې ادارې (FAO) د جمعې په ورځ اعلان وکړ چې د افغانستان د ختیځو ولایتونو د زلزلهځپلو سیمو شاوخوا ۴۵۰ کیلومتره مربع کرنیزه ځمکه له خطر سره مخامخ ده او د خلکو د معیشت سرچینې سختې زیانمن شوې دي.
دې ادارې خبرداری ورکړی چې تر ۵ لکه زیات څاروي له جدي ګواښونو سره مخامخ دي.
د FAO د نوې راپور له مخې، د څارویو لپاره ذخیره شوې واښه له منځه تللي او د هغوی پناهځایونه هم ویجاړ شوي دي.
هغه کورنۍ چې د جوارو، غنمو، لوبیا، وریجو، شیدو او غوښې له لارې یې ژوند کاوه، اوس د خوړو له سخت کمښت سره، په ځانګړې توګه د خپلو ماشومانو لپاره، مخامخ دي.
د دې ادارې د شمېرو له مخې، تر ۹۵۰ زرو زیات کسان په زلزلهځپلو ولایتونو کې د خوړو له شدیدې ناامنۍ سره مخامخ دي، او ګومان کېږي چې له زلزلې او د خلکو د معیشتي سرچینو له ویجاړېدو وروسته دا شمېر نور هم ډېر شوی وي.
FAO د پاتې څارویو د ساتنې او د ناروغیو د خپرېدو د مخنیوي لپاره تر اوسه ۱۱۶۳ څاروي واکسین کړي دي. دغه راز یې د انسان او څاروي د ګډو ناروغیو او د اوبو د ککړتیا د مخنیوي لپاره تر ۵۶۰۰ ډېر د څارویو مړي په خوندي ډول خاورو ته سپارلي دي.
دې سازمان خبرداری ورکړی چې د ژمي د رانژدې کېدو له امله کورنۍ ډېر لږ وخت لري څو خپلې مځکې چمتو کړي او خپل څاروي وساتي؛ د دې فرصت له لاسه ورکول کېدای شي په راتلونکي کال کې د حاصلاتو د نه ترلاسه کېدو او تر ۲۰۲۶ کال پورې د ژورې لوږې معنا ولري.
FAO د عاجلو او حیاتي کرنیزو مرستو د برابرولو لپاره له ۲۳ میلیونه ډالرو ډېرې مرستې ته اړتیا لري.