تاند ( شنبه د وږي ـ سنبلې ۲۹مه) وال ستریټ ژورنال د امریکایي چارواکو له قوله لیکي چې، د ټرمپ حکومت له طالبانو سره د خبرو په حال کې ده څو بګرام هوایي اډې ته د محدودو امریکایانو د بېرته راتګ زمینه برابره کړي.

سرچینې ویلي چې، آدام بوهلر چې څو ورځې وړاندې له خلیلزاد سره کابل ته تللی وو د دې خبرو اترو اصلي ماموریت ور ترغاړې دی.

وړمه ورځ د امریکا ولسمشر د بریتانیا له صدراعظم سره په یوه خبري غونډه کې وویل، حکومت یې هڅه کوي چې په افغانستان کې د بګرام هوايي اډه بېرته ونیسی. «دا ښايي تازه (بریکینګ) خبر وي.»

افغانستان ته د بېرته ګرځېدو او د بګرام د هوايي اډې د بیرته نیولو په اړه د ټرمپ د څرګندونو په مهال د بریتانیا صدراعظم ټرمپ ته تعجب وکتل.

ټرمپ همداراز وویل:«د دې اډې د لرلو یو دلیل دا دی چې هغه د چین د اتومي وسلو له ځایه یو ساعت لیرې دی.»

ټرمپ بګرام د نړۍ ستره هوايي اډه وبلله.

خو پرون جمعه بیا د چین د بهرنیو چارو وزارت د بګرام د هوايي اډې او چین ته د دې اډې د نژدېوالي په اړه د امریکا د ولسمشر ډنالډ ټرمپ د څرګندونو په اړه نرم غبرګون وښود.

د چین د باندنیو چارو وزارت ویندویې لین جیان د ټرمپ د څرګندونو په غبرګون کې د افغانستان د خپلواکۍ، حاکمیت او ځمکنۍ بشپړتیا د درناوي غوښتنه وکړه.

دې زیاته کړه چې پیکینګ د افغانستان حاکمیت ته درناوی لري، خو هغه اقدامات چې په سیمه کې کړکېچ زیات کړي او یا هم شخړه رامنځته کړي،ورته د منلو نه دي.

د چین د بهرنيو چارو وزارت ویاندې همداراز وویل:
«چین د افغانستان ځمکنۍ بشپړتیا او حاکمیت ته درناوی لري. د افغانستان راتلونکی باید د افغانستان د خلکو په لاس کې وي.»

هغې، چې په یوه خبري غونډه ې خبرې کولې، دا هم وویل چې د افغانستان برخلیک باید د افغانانو په لاس وټاکل شي.