تاند(یکشنبه، د وږي/ سنبلې ۲۳ مه) کاناډايي رسنیو راپور ورکړی چې د یکشنبې په ورځ د کلګري ښار په مرکزي برخه کې د افغانانو په یوه رستوران کې ډزې شوې دي چې له امله یې یو تن ټپي شوی دی.
دا پېښه د ښار په جنوب لوېدیځ کې د «کابل لانج» رستوران کې شوې ده.
له ډزو وروسته، د کلګرۍ پولیسو د رستورانت شاوخوا سیمه تړلې او د پېښې پلټنې یې پیل کړي دي.
پولیسو په یوه بیان کې ویلي:
«دا برید هدفمن ښکاري او دا مهال د عامو خلکو پر وړاندې کوم بل ګواښ نشته.»
تر اوسه د بریدګر یا د برید د احتمالي انګیزې په اړه جزییات نه دي خپاره شوي.
د کلګرۍ د پولیسو یوه افسر مایک کلم ویلي، د ټپي کس وضعیت بد نه دی او ټپونه یې جدي نه دي.