تاند(یکشنبه، د وږي/ سنبلې ۳۰ مه) د «اوپناېآی» او «ډیپ سیک» سیال؛ امارات د ارزانه مصنوعي ذکاوت ماډل «K2 Think» نندارې ته وړاندې کړ.
د مصنوعي ځیرکتیا (AI) یو نوی او ارزانه ماډل دا ځل د متحده عربي اماراتو له لوري د نړیوالې ټکنالوژۍ میدان ته راووت.
د محمد بن زاید د مصنوعي ځیرکتیا پوهنتون په ابوظبي کې د سېشنبې په ورځ له یوه کملګښته استدلالي ماډل څخه پرده پورته کړه، چې هیله لري له «ډیپ سیک» او «اوپناېآی» سره سیالي وکړي.
وروسته له هغې چې د سږ کال په جنورۍ کې د چین یوه څېړنیز لابراتوار ادعا وکړه چې د امریکا د «اوپناېآی» (چې «چتجيپيټي» یې جوړ کړی) لاستهراوړنو ته د لږ بودجې او انرژۍ په لګولو سره نژدې شوی، د مصنوعي ذکاوت بازار یو ځل بیا تود شو.
اماراتي ماډل چې «K2 Think» نومېږي، د پارامېترو له پلوه (هغه متغیرونه چې په ماشیني زدهکړه کې د معلوماتو د پروسس کولو او وړاندوینې څرنګوالی ټاکي) د خپلو سیالانو په څېر لکه «ډیپ سیک» کوچنی دی. خو د پروژې څېړونکي وايي د دې ماډل د کار نتیجه د «اوپناېآی» او «ډیپ سیک» له استدلالي ماډلونو سره برابره ده.
پوهنتون په یوه بیان کې وویل:
«K2 Think د استدلالي ماډلونو یوه نوې درجه ده. دې ماډل د اوږدو استدلالي زنځیرونو پر بنسټ د څارنې له لارې خپل منطقي ژوروالی پیاوړی کړی او بیا یې د تقویتي زدهکړې او باور وړ انعامونو په وسیله د ستونزمنو مسئلو په حل کې خپل دقت لوړ کړی دی.»
د محمد بن زاید پوهنتون د بنسټیزو ماډلونو د انسټیټیوټ مشر هکتور لیو، سيابنبيسي ته په مرکه کې وویل:
«هغه څه چې زموږ ماډل ځانګړی کوي دا دی چې موږ پرې یوازې د یو ماډل په توګه نه، بلکې د یوه سیستم په توګه فکر کوو. له همدې امله د عادي ماډلونو د متن برعکس چې یوازې خپرېږي، موږ دا ماډل ځای پر ځای کړی او ګورو چې څنګه یې د وخت په تېریدو کې ښه کولی شو.»
د نړۍ تر ټولو تېزله و او اغېزمنو استدلالي سیستمونو څخه
محمد بن زاید پوهنتون همداراز وویل چې K2 Think د نړۍ له تر ټولو تېزو او اغېزمنو استدلالي سیستمونو څخه دی او په یوه ثانیه کې د ۲ زره ټوکنونو (شاوخوا ۱۵۰۰ ټکو) د پروسس کولو وړتیا لري.
دغه ماډل د عليبابا پر «Qwen 2.5» لوی ژبني ماډل ولاړ دی او د «Cerebras» د شرکت (چې د مصنوعي ځیرکتیا چپس تولیدوي) پر هارډوېیر باندې پرمخ وړل کېږي.
لکه څنګه چې د K2 Think اړوند R1 ماډل متن پرانیستی دی، همداسې د چین د «ډیپ سیک» متن هم پرانیستی دی؛ یعنې د زدهکړې معلومات او وزنونه یې د عامو خلکو لپاره د لاسرسي وړ دي.
پوهنتون ټینګار وکړ:
«دغه نوې کچه شفافیت تضمینوي چې د استدلال په برخه کې د ماډل د زدهکړې هر ګام د نړیوالې څېړنیزې ټولنې له خوا د څېړلو، بیا تولید او پرمختیا وړ وي.»
په مصنوعي ځیرکتیا کې نړیواله سیالي
دغه ټکنالوژي د مصنوعي ذهانت په نړیواله سیالۍ کې ستر بدلونونه راوستلای شي.
که څه هم د دې ډګر مشري اوس مهال د امریکا او ورپسې د چین په لاس کې ده، خو نور هېوادونه هم هڅه کوي خپل ځای ومومي.
پوهنتون وویل:
«K2 Think د اماراتو لپاره د مصنوعي ځیرکتیا په برخه کې یوه برخلیکټاکوونکې شېبه ده. دا ماډل ښيي چې څنګه نوښت او د دولتي او خصوصي سکتور نژدې همکاري کولای شي ابوظبي د مصنوعي ځیرکتیا نړیوال مشر کړي او څرګندوي چې د استدلال راتلونکی یوازې په سویې پورې نه دی تړلی، بلکې د خلاقیت او همکارۍ په مټ جوړېږي.»