تاند(یکشنبه، د وږي/ سنبلې ۲۳ مه) د امریکا د سي بي ایس نیوز د راپور له مخې، طالبانو د شنبې په ورځ وویل چې د افغانستان او امریکا د اړیکو د عادي کولو د هڅو په لړ کې د امریکا له استازو سره د بندیانو د تبادلې په اړه موافقې ته رسېدلي دي.
طالبانو د موافقې جزئیات ورنه کړل او سپینې ماڼۍ هم کابل ته د خپل پلاوي د سفر او د طالبانو د اعلامیې په اړه څه ونه ویل. طالبانو د خبرو اترو تصویرونه خپاره کړل چې پکې د دوی د ريیس الوزرا اقتصادي مرستیال ملاعبدالغني برادر او د بهرنیو چارو وزیر امیرخان متقي د ولسمشر ډونالډ ټرمپ د بندیانو د چارو له ځانګړي استازي ادم بوهلر او د افغانستان د سولې لپاره د امریکا له پخواني استازي زلمي خلیلزاد سره لیدل کېږي. د طالبانو په وینا، د بندیانو په اړه بوهلر “تایید کړه چې دواړه خواوې به د بندیانو د تبادلې اقدام وکړي.” خو دا څرګنده نه شوه چې په دواړو هېوادونو کې څومره کسان نیول شوي، څوک دي او د کومو لاملونو له مخې بندیان شوي دي.
دا کتنه وروسته له هغه وشوه چې طالبانو په مارچ میاشت کې یو امریکایي وګړی جورج ګلیزمن خوشې کړ، چې د سیلاني په توګه افغانستان ته تللی و او هلته ونیول شو. نوموړی د ټرمپ له واک ته رسېدو وروسته د طالبانو له خوا درېیم امریکایي وګړی و چې طالبانو خوشي کړ. لږ وروسته طالبانو یوه امریکایي ښځه فای هال هم خوشې کړه، چې د بې اجازې ډرون کارونې په تور نیول شوې وه.
د شنبې په ورځ په تلابیب کې د خبریالانو پوښتنو ته په ځواب کې د امریکا د بهرنیو چارو وزیر مارکو روبیو وویل چې د امریکا استازي له طالبانو سره له څه مودې راهیسې خبرې کوي، خو د کومې موافقې جزئیات یې تایید نه کړل. هغه زیاته کړه: “[بوهلر] هلته ولاړ چې وګوري څه امکان لري. په ښکاره ډول، د هر ډول تبادلې یا تړون وروستۍ پرېکړه د ولسمشر له لوري کېږي، خو موږ په کلکه غواړو چې ټول امریکایان او هغه کسان چې په ناحقه بند دي، خوشې شي.”
دا خبرې وروسته له هغه کېږي چې طالبانو د افغانانو پر سفر د ولسمشر ټرمپ پر نوي بندیز سخت غبرګون ښکاره کړ.
طالبانو په خپله خبرپاڼه کې وویل: “د دواړو هېوادونو ترمنځ د دوه اړخیزو اړیکو د پراختیا، د وګړو اړوند موضوعاتو او د افغانستان د پانګونې د فرصتونو په اړه هر اړخیزې خبرې وشوې.”
په خبرپاڼه کې دا هم راغلي چې د امریکا پلاوي د افغانستان د ختیځ د وروستۍ زلزلې له امله د خواخوږۍ مراتب وړاندې کړل. په دېزلزله کې تر ۲۲۰۰ډېر کسان وژل شوي دي.