تاند(یکشنبه، د وږي/ سنبلې ۲۳ مه) د امریکا د بندیانو د چارو ځانګړي استازي ادم بوهلر او ورسره ملګري پلاوي د شنبې په ماسپښین په ارګ کې د طالبانو د ريیس الوزرا له اقتصادي مرستیال ملاعبدالغني برادر سره وکتل.
د باختر اژانس د راپور له مخې، په دې ناسته کې د افغانستان د سولې لپاره د امریکا پخواني استازي زلمي خلیلزاد هم ګډون کړی و. د غونډې تمرکز په افغانستان کې پر روان وضعیت او د افغانستان او امریکا ترمنځ د سیاسي او اقتصادي همکاریو د پراختیا پر امکاناتو و.
ملا عبدالغني برادر په خبرو کې څرګنده کړه چې په افغانستان کې فساد او د نشهيي توکو کرل له منځه تللي، د بیکارۍ کچه راټیټه شوې او د افغاني اسعارو ارزښت د بهرنيو اسعارو پر وړاندې ثابت پاتې شوی دی. نوموړي د بانکدارۍ په سکتور کې پرمختګونه، د صادراتو زیاتوالی او د لویو بنسټیزو پروژو د پیل هم یادونه وکړه.
د طالبانو د ريیس الوزرا د اقتصادي چارو مرستیال زیاته کړه چې د پانګهوالو د هڅونې لپاره ځانګړي قوانین جوړ شوي، د وزارتونو ترمنځ ګډه کمیټه او د پنځو کلونو ملي انکشافي ستراتیژي رامنځته شوې ده څو د کورنیو او بهرنیو پانګونو زمینه برابره کړي.
هغه پر امریکا غږ وکړ چې د تقابل له دریځ څخه رغنده تعامل ته مخه کړي او د افغانستان د بیارغونې په چارو کې ونډه واخلي.
له بلې خوا، ښاغلي بوهلر له افغانستان سره د امریکا د اقتصادي همکاریو او پانګونې ژمنه تکرار کړه او ویې ویل چې دا به تر ډېره د خصوصي سکتور په همکارۍ عملي شي.
په خبرو کې د بندیانو موضوع هم مطرح شوه، او ښاغلي بوهلر د دواړو هېوادونو ترمنځ د بندیانو د تبادلې غوښتنه وکړه.