تاند/دوشنبه د وږي ـ سنبلې ۱۰مه/ پخوانیو ولسمشرانو اشرف غني او حامدکرزي ختیځ کې د زلزله ځپلو له کورنیو سره خواخوږي ښوذلې او د بېړنیو مرستو د رسېدو ټینګار یې کړی دی.
ولسمشر غني، د دغې مرګونې زلزلې له امله زیانمنو کورنیو او هېوادوالو ته تسلیت ویلی او ټپیانو ته یې د ژر رغېدو او «مړو» ته د الهي رحمت د پېرزوینې دعا کړې ده.
غني په خپل پیغام کې پر خپلمنځي لاسنیوي او د مرستو سربېره، د لویو ناورینونو پر وړاندې پر منسجمو کړنو ټينګار کړی.
هغه په ټولو هېوادوالو غږ کړی چې د تېرو ناورینونو په څېر چې لاسونه یې یو کړي وو او مرستو ته یې دانګلي وو، نن هم د یو بل ترڅنګ ودرېږي او ګډ اقدامات وکړي.
په ورته وخت کې پخواني ولسمشر، حامد کرزي په کونړ، ننګرهار، لغمان، نورستان، پنجشېر او د هېواد په نورو سیمو کې د تېرې شپې زلزلې له امله خواشیني څرګنده کړې ده.
کرزي له ټولو خیریه بنسټونو، ملي سوداګرو او نړیوالو مرستندویه ادارو هیله کړې، چې زیانمنو کورنیو سره مرسته وکړي.
حامدکرزي د زلزلې له امله ټپیانو ته د روغتیا هیله کړې او د وژل شویو هېوادوالو کورنیو ته یې تسلیت وړاندې کړی دی.
د هېواد ختیځ کې د تېرې شپې مرګونې زلزلې له امله لږ تر لږه ۸۰۰ کسان وژل شوي او ۲۵۰۰ نور ټپیان شوي دي.
دا زلزله تېره شپه د هېواد په کونړ، ننګرهار، لغمان او یو شمېر نورو سیمو کې وشوه، چې د ریشتر په کچه ۶.۰ درجې اټکل شوې ده.