تاند/جمعه د وږي ـ سنبلې ۷مه/د روسیې د امنیت شورا سلاکار سرګي شویګو په «روسیسکایا ګازیتا» ورځپاڼې یوه لیکنه کې ویلي، چې افغانستان کې تر ۲۳ زرو زیات د ترهګرو ډلو غړي او وسله وال موجود دي.
شویګو دې مقاله کې ویلي، چې د روسیې اټکلونه ښيي، چې د طالبانو تر کنټرول لاندې افغانستان کې شاوخوا ۲۰ نړیوالې ترهګرې ډلې فعالې دي چې، د جنګیالیو شمېر یې ۲۳ زرو ته رسېږي.
ټاس خبري آژانس په راپور کې راغلي، چې شویګو تر ټولو لویه اندېښنه داعش خراسان څانګه بللې.
نوموړي زیاته کړې، چې دغه ډله د افغانستان په ختیځ، شمال او شمال ختیځ کې روزنیز کمپونه او ملاتړي مرکزونه لري.
سرګي شویګو زیاته کړې، چې د ترهګرو ډلو فعالیتونه لا هم د مخدره موادو د تولید له فکتورونو سره نېغ تړاو لري.
روسیه لومړنی هېواد دی، چې طالبان یې په جولای میاشت کې د ترهګرۍ پر وړاندې د ګډې مبارزې د مشروعیت لپاره په رسمیت وپېژندل، خو تر اوسه طالبانو د روسیې د څرګندونو په اړه څه نه دي ویلي.
هغه پر طالبانو د نړیوالې ټولنې بندیزونه «ظالمانه» بللي او ټينګار یې کړی، که دا نه وای، د ترهګرۍ پر وړاندې به د دغې ډلې مبارزه خورا اغېزناکه وای.
روسیه چې د افغانستان له شماله د داعش خراسان څانګې د ترهګرۍ جدي ګواښ محسوسوي، په تېرو څو کلونو کې د مسکو سربېره په یو شمېر ښارونو کې دغې ډلې لوی بریدونه کړي دي.
افغانستان کې د ترهګرۍ د ګواښ په اړه د روسیې اندېښنې داسې مهال دي، چې بل لورته امریکا تایید کړې، چې طالبان یې د ترهګرۍ پر ضد مبارزه کې «همکاران» دي.
طالبانو تازه په دې تړاو غبرګون نه دی ښودلی خو تر دې وړاندې یې په ځلونو په افغانستان کې د ترهګرو ډلو شتون رد کړی دی.