تاند (دوشنبه، د وږي/ سنبلې ۳ مه) د افغانستان کرکټ بورډ وايي، افغانستان به په اکتوبر میاشت کې د بنګله دېش کوربه وي او دواړه لوبډلې به د دې دوه اړخیزې کرکټ لړۍ په ترڅ کې درې یو ورځنۍ نړیوالې سیالۍ (ODIs) او درې شل اوریزې نړیوالې سیالۍ ترسره کړي.
د کرکټ بورډ د سرچینو په وینا، دا لړۍ به په متحده عربي اماراتو کې ترسره شي، چې د اکتوبر له ۲مې نیټې پیلېږي او د اکتوبر تر ۱۴مې به دوام وکړي.
د کرکټ بورډ د معلوماتو له مخې، د شل اوره سیالیو لړۍ به د اکتوبر په ۲مه پیل شي، دوهمه سیالي به د اکتوبر په ۳مه او وروستۍ د اکتوبر په ۵مه ترسره شي. ټولې لوبې به په شارجه کرکټ لوبغالي کې ترسره شي.
له شل اوریزو لوبو وروسته دواړه لوبډلې ابوظبۍ ته سفر کوي، څو د یو ورځنیو نړیوالو سیالیو (ODIs) لړۍ په زاید کرېکټ لوبغالي کې ترسره کړي. لومړۍ ODI د اکتوبر په ۸مه، دویمه د اکتوبر په ۱۱مه او درېیمه د اکتوبر په ۱۴مه پلان شوې ده.
همدارنګه دواړه ټیمونه د روان کال په آسیایي جام کې هم برخه لري، چې پکې په یوه ګروپ کې ځای پر ځای شوي دي.