تاند/دوشنبه د وږي ـ سنبلې ۲مه/ د بدخشان کوهستان ولسوالۍ کې ترافیکې پېښې د یوې کورنۍ ۷ کسانو ته مرګ ژوبله اړولې ده.
بدخشان کې د طالبانو د حکومت امنیې قومندانۍ ویاند احسان الله کامګار وايي، پېښه پرون یکشنبه مازدیګر ناوخته د یادې ولسوالۍ اړوند شوپای پل سیمه کې هغه مهال رامنځته شوه،کله چې یو فلډر موټر له سړک څخه ووت او چپه شو.
نوموړی وايي، په دې پېښه کې د یوه څلور کلن ماشوم او مېرمنې په ګډون درې تنه مړه او څلور تنه نور ټپیان دي.
کامګار زیاته کړې، ټپیان دا مهال په روغتون کې دي او د پېښې لامل د سړک خرابوالی دی.
د پېښې د رامنځته کېدو لامل د موټر چلوونکي بې احتیاطي ښودل شوې.
په دې وروستیو کې د افغانستان په ولایتونو کې ترافیکي پېښې زیاتې شوي، چې له امله یې خلک سخت اندېښمن شوي.
عام خلک له طالبانو غوښتنه کوي، چې د ټولو هغو عواملو د مخنیوي لپاره هڅې وکړي، چې له امله یې ترافیکي پېښې زیاتې شوي.
بې لاسه موټرو زیاتوالی، بې احتیاطي،د ترافیکي قوانینو نه مراعت، د ترافیکي اشارو نشتون یا کمښت، خراب سړکونه او د حکومت له لوري بې غوري د پېښو د زیاتوالي لوی لاملونه یادېږي.
تر دې وړاندې سخته او بوږنوونکې پېښه د هرات ولایت وه چې له امله یې ۷۹تنو ژوند بایلود، چې ډېری یې له ایرانه تازه راغلي کډوال وو.