تاند『شنبه د زمري ـ اسد ۲۵مه』د آلمان د بهرنیو چارو وزارت د جمعې په ورځ (د اګست ۱۵مه) په یوه خبرپاڼه کې ویلي،چې له افغان ولس سره به ۶٫۸۷ میلیونه ډالره بشري مرسته وکړي.
په خبرپاڼه کې ویل شوي، چې د افغانستان خلک له سخت بشري ناورین سره مخ دي او شاوخوا ۲۳ میلیونه وګړي په دې هېواد کې د کافي خوړو، څښاک اوبو او درملو ته لاسرسی نه لري.
د آلمان د بهرنیو چارو وزارت په داسې حال کې دا مرسته اعلانوي، چې د ناروی د کډوالو د شورا رییس وایي د افغانستان اوسنی وضعیت له پخوا هم بحراني شوی او نړیواله ټولنه باید د واټن پر ځای د بشري او پرمختیایي مرستو پر برابرولو کې اقدام وکړي.
یان ایګلند په هغه پیغام کې چې د طالبانو د بیا واکمنېدو د څلورمې کلیزې په مناسبت خپور کړی، خبرداری ورکړی چې د افغانستان په اړه بې پروايي به پراخ ناوړه انساني پایلې ولري.
ایګلند له مرستندویه هېوادونو غوښتنه کړې، چې په افغانستان کې خپل دیپلوماتیک حضور بېرته پیل کړي.
د هغه په وینا، د سیاسي استازو ستنېدل کابل ته کولی شي د مستقیمو همکاریو زمینه برابره کړي او د افغان ښځو او نجونو د حقونو ملاتړ په برخه کې به هڅې لا پیاوړې شي.
له بلې خوا پرون جمعه د ملګرو ملتونو د خوړو نړیوال پروګرام (WFP) ویلي، چې د افغانستان اقتصادي وضعیت په خرابېدو دی او میلیونونه کسان په دې هېواد کې بېړنیو مرستو ته اړتیا لري.
د خوړو د نړیوال پروګرام رییسه مري الن زیاته کړې چې په افغانستان کې، دغه سازمان د افغانانو د لوږې پر وړاندې د مبارزې او د مرستې لپاره نړیوال ملاتړ ته اړتیا لري.
هغې ویلي، تر اوسه WFP په افغانستان کې شلو میلیونو کسانو ته مرسته رسولې ده، خو د هغې په وینا شپږ میلیونه افغانان لوږې سره مخ دي.