تاند『چهارشنبه د زمري ـ اسد ۲۲مه』د امریکا د بهرنیو چارو وزارت په یوه تازه راپور کې وايي، چې ګڼ شمېز کره راپورونه شته ،چې طالبان د پخواني جمهوري نظام له امنیتي او ملکي کارکوونکو د غچ اخیستنې په موخه صحرايي محکمې کوي.
راپور د یوناما او د افغانستان لپاره د ملګرو ملتونو ځانګړي راپور ورکوونکي د موندنو پر بنسټ لیکي، چې د طالبانو له خوا دا وژنې، کورونو، زندانونو او نورو عامه ځایونو کې شوې دي، چې ښځې هم پکې شته.
که څه هم طالبانو د عمومي عفوې فرمان اعلان کړی، خو شواهد ښيي چې دوی په پنجشېر، کابل، ننګرهار، کندوز، نیمروز، غزني، خوست، جوزجان، فاریاب، تخار، سرپل او هرات کې پخواني افغان نظامیان د بېلابېلو تورونو له امله وژلي دي.
د امریکا د بهرنیو چارو وزارت په وینا، طالبانو د دغو کسانو د وژنې لپاره پر هغوی د داعش یا نورو وسله والو مخالفو ډلو د غړیتوب تورونه لګولي دي.
د سر چینې معلومات ښيي، چې طالبانو د «یرموک» په نوم ځانګړی ځواک ګومارلی، څو په پټه د پخوانیو افغان ملي، امنیتي او دفاعي ځواکونو کارکوونکي په نښه کړي.
د امریکا خارجه وزارت ویلي، چې طالبانو هېڅکله هڅه نه ده کړې، چې خپله وسله وال د دې وژنو په اړه مسوول وګرځوي.
یوناما په خپل وروستي درې میاشتني راپور کې ویلي، چې طالبانو په دې موده کې ۷ پخواني افغان نظامیان وژلي او ۸ نور یې نیولي او شکنجه کړي دي.
د برتانیا ټیلیګراف ورځپاڼې هم څو ورځې وړاندې راپور ورکړی چې طالبانو شاوخوا ۲۰۰ پخواني افغان نظامیان وژلي دي، چې برتانوي ځواکونو یې معلومات افشا کړي وو.
طالبانو تر اوسه د امریکا د بهرنیو چارو وزارت د دې راپور په اړه غبرګون نه دی ښودلی.